Bashkia Kukës organizoi sot promovimin e librit shkencor “Kukësi, vështrim arkeologjik”, i Prof. Dr. Luan Përzhitës, Drejtor i Institutit të Arkeologjisë.

Në këtë ceremoni, e cila u zhvillua nën kujdesin e veçantë të Kryetarit të Bashkisë, Z.Bashkim Shehu, veç të ftuarve të shumtë morën pjesë edhe arkeologë e studiues si Prof. Neritan Ceka, Prof. Muhamet Bela, arkeologu nga Prishtina, Prof. Kemajl Luci si dhe Prefekti i Qarkut Kukës, Z. Zenel Kuçana.




Kryetari i Bashkisë, Z.Bashkim Shehu në fjalën e tij tha:
“Qeveria apo edhe ne si pushtet vendor kemi detyrimin që të bëjmë sa më shumë për artin e trashëgiminë kulturore. Ne si bashki kemi miratuar Planin e Përgjithëm Vendor, ku turizmi zë vendin kryesor për zhvillimin e zonës, por zhvillimi i turizmit është i lidhur ngushtë edhe me trashëgiminë kulturore. I jemi mirënjohës Prof. Dr. Luan Përzhitës për këtë dhuratë që po i bën Kukësit. Një libër i veçantë në llojin e tij për Kukësin.”


Gjithashtu kryebashkiaku Shehu u bëri thirrje të gjithë biznesmenëve kuksianë që të mbështesin njerëzit e artit e kulturës në Kukës.

Arkeologët, Prof. Neritan Ceka, Prof. Muhamet Bela dhe Prof. Kemajl Luci e vleresuan së tepërmi këtë studim, duke i shtuar një tjetër dimension Kukësit në drejtim të trashëgimisë, historisë, kulturës por edhe turizmit.




Ndërsa autori i librit, Prof. Dr. Luan Përzhita, pasi falenderoi të pranishmit për vlerësimin dhe bashkinë për mbështetjen në botimin e librit, prezantoi edhe projektin për rikthimin e këtyre vlerave në shërbim të promovimit të zonës.

Botimi i librit “Kukësi, vështrim arkeologjik” (në gjuhët shqip e anglisht) është financuar nga Bashkia Kukës dhe do të jepet falas për të gjithë të interesuarit.

Kukësi njihet si një ndër vendbanimet më të hershme, që daton rreth 6000 vite para krishtit. Bashkia Kukës prej dy vitesh ka nisur investimet për nxjerrjen në dritë të këtyre vlerave duke nisur me rijetëzimin e Kalasë së Pecës.